دور كيومين إحنا
دور كيو تطبيقين: تطبيق للعملاء لحجز الدور عند محلات الحلاقة والبيوتي سنتر، وتطبيق دور كيو بيزنس لأصحاب المحلات. التطبيقين تبع شركة SOAcode في جمهورية مصر العربية، وهي المسؤولة عن بياناتك. السياسة دي بتشرح بنجمع إيه، وليه، ومين بيشوفه، وإزاي تمسحه.
البيانات اللي بنجمعها من العملاء
- رقم الموبايل: للدخول بكود التحقق، ولتأكيد الحجز على واتساب.
- الاسم واختيار "ولد" أو "بنت": الاسم علشان المحل يعرفك، والاختيار علشان نعرضلك المحلات المناسبة (محلات حلاقة أو بيوتي سنتر) ونكلمك بالصيغة الصح.
- الحجوزات: المحل والحلاق والخدمات، ومكانك في الطابور، وردودك على الإشعارات، والمبلغ اللي المحل سجّله بعد الخدمة.
- التقييمات والتعليقات اللي بتكتبها، والمحلات اللي بتحطها في المفضلة.
- الموقع: بس لما تختار "الأقرب ليا"، علشان نرتّبلك المحلات حسب المسافة. بنطلب الإذن الأول، وتقدر ترفضه وتدور بالمنطقة بدله.
- بيانات الجهاز: رمز الإشعارات، علشان نبعتلك تنبيهات الدور.
البيانات اللي بنجمعها من أصحاب المحلات
- الاسم ورقم الموبايل، واسم المحل، ونوعه، وجمهوره (رجالي أو حريمي).
- عناوين الفروع ومكانها على الخريطة، وصورها، ومواعيد العمل، وأسامي الحلاقين أو الكوافيرات.
- صورة البطاقة والسجل التجاري: للتوثيق بس. محدش بيشوفهم غير فريق المراجعة عندنا.
- الخدمات والأسعار، والمبالغ اللي بتتسجل بعد كل خدمة، علشان نطلعلك تقارير الدخل.
- بيانات مسؤولي الفروع اللي صاحب السلسلة بيضيفهم (الاسم ورقم الموبايل).
بنستخدم البيانات في إيه
- تشغيل الحجز والطابور، وحساب وقت الانتظار المتوقع.
- نبعتلك إشعارات قرب الدور، ورسالة واتساب لتأكيد الحضور لو مارديتش على الإشعار.
- تطبيق قواعد التأخير والإلغاء، ومنها الإيقاف المؤقت عن الحجز لو اتأخرت مرتين.
- نطلع لأصحاب المحلات تقارير الدخل والتقييمات.
- نرد على الشكاوى، ونحمي الخدمة من إساءة الاستخدام.
مش بنبيع بياناتك لأي حد، ومش بنستخدمها في إعلانات.
مين بيشوف بياناتك
- المحل اللي حجزت عنده: بيشوف اسمك وتفاصيل حجزك وحالة تأكيدك، علشان يدير الطابور.
- العملاء التانيين: بيشوفوا تقييمك وتعليقك على المحل، من غير رقم موبايلك.
- مزودي خدمات بنشتغل معاهم: الاستضافة، وخدمات الإشعارات من Apple وGoogle، وواتساب من Meta لرسائل التأكيد، وخرائط Google. بياخدوا بس اللي محتاجينه علشان يقدموا الخدمة.
- الجهات الرسمية، لو القانون المصري طلب ده.
مسح الحساب والاحتفاظ بالبيانات
- تقدر تمسح حسابك في أي وقت من جوه التطبيق: من "حسابي" في تطبيق العملاء، أو "بيانات الحساب" في تطبيق المحلات.
- بعد المسح، رقم موبايلك بيتشال من كل مكان. وسجل حجوزاتك وتقييماتك بيفضل عند المحل باسم "عميل محذوف"، من غير أي بيانات تعرّف بيك، علشان تقارير المحل تفضل صح.
- لو عليك إيقاف مؤقت عن الحجز ومسحت حسابك، بنحتفظ برقمك لحد ما مدة الإيقاف تخلص بس، وبعدها بيتمسح.
- صور البطاقة والسجل التجاري بتتمسح لما المحل يمسح حسابه.
الأمان
البيانات بتتبعت متشفرة، والوصول ليها محدود بالناس اللي محتاجاها في شغلها. ومفيش نظام أمان كامل ١٠٠٪، فلو حصل أي اختراق يأثر عليك، هنبلغك.
الأطفال
التطبيق مش موجّه للأطفال أقل من ١٣ سنة. ولو أقل من ١٨ سنة، استخدمه بمعرفة ولي أمرك.
تعديل السياسة
لو غيرنا حاجة مهمة في السياسة دي، هنبلغك جوه التطبيق قبل ما التغيير يبدأ. وتاريخ آخر تحديث مكتوب فوق.
تواصل معانا
أي سؤال أو طلب بخصوص بياناتك، ابعتلنا على support@doorq.app.